கடலாகுதலின் சூத்திரம்

திறந்தே கிடக்கிறது பிரபஞ்சா
முத்த உதடுகளும் 
கொஞ்ச மாம்சமு்ம்
இளஞ்சிவப்பு உதட்டுச்சாயம் படிந்த
நிரம்பாத புனிதக் கோப்பைகளும்

பெருநதிக்குள் இருக்கும் கதவுகள்
கடல்களுக்கு அழைத்துச் செல்கிறது
சுற்றிலும் கடலே இருக்கிறது
கடலைச் சுற்றிலும் நானே இருக்கிறேன்
சுவாசங்கள் நீராலாகிறது
பெருமூச்சுகள் முத்துச்சிற்பிகளாகிறது
முத்த உதடுகள் கடல் குடிக்கிறது
கொஞ்ச மாம்சத்தை பேரன்பு தின்கிறது
பானங்களில் கரைகிறது புனிதக் கோப்பைகள்
கடலுக்கும் எனக்கும் உதடுகளில்லை
அன்பின் நீர்மம் நேர் நிற்பவைகளைக் குடித்தலைகிறது
மதுச்சுரப்பிகளில் வாய் பதித்திருக்கும்
தீராக் குடிகாரனாகி
கலன்கள் உடைகிறது
சிவந்த மது ஆயிரம் கால்களால்
கடல் மேல் ஓடிக் கொண்டிருக்கிறது
போதையின் உச்சிகளில்
மௌனங்கள் மலர்கிற காலைகளில்
நிதம்ப நதியின் கரையோரம்
இந்திரிய விருட்சத்தின் தரையில்
ஞானம் பெற்றோம்
நாணி மலர்ந்தது ஒளிவட்டம்